一年一度嘅書展下周三開幕，唔少書迷引頸以待，可惜今年港股表現不濟，財經書嘅銷量恐怕會大打折扣。
財演黃國英教操盤
話雖如此，唔少財經人依然冇有怕，照樣推新作品，好似精電（710）CEO兼《主場新聞》創辦人蔡東豪咁，嚟緊書展就會有多本新書應市，涉獵嘅範圍亦非常之廣，同佢百足咁多爪嘅形象非常脗合，當中有探討強國人買名牌嘅來龍去脈，有研究跑步哲學，更有呼籲商界支持真普選，絕對照顧到不同興趣人士嘅需要。
至於出名牙尖嘴利嘅豐盛融資資產管理董事黃國英，最近亦出咗本講操盤心理嘅書，「好多散戶都覺得自己做啱，咁樣只會輸得更多！」佢話新作就係教大家要假設自己嘅投資決定係錯，先可以強化操盤能力。佢仲講笑話，本書係適合短炒搏殺嘅股民，呢排大市咁chok，啱晒啦。