今季先後勇奪工商盃及銀牌嘅南華籃球隊，前晚以24分大炒飛鷹，直落3:0掃走對手，榮膺3冠王；班主洪游奕噚日就舉行慶功宴，請全隊食番餐勁，更大讚23歲中鋒惠龍兒（Duncan）已成為真正嘅鄧肯（馬刺前鋒），係球隊衞冕嘅關鍵人物，而呢位洋將亦為自己訂下兩年目標：衝擊CBA。
獲潯興班主盛讚
南華前晚成為籃總喺05年引入季後賽後，首支直落3場掃走對手而封王嘅球隊，真係威過威士忌，最後一仗攻入全場最高17分嘅Duncan，仲俾有入場睇波嘅CBA福建潯興班主施能坑賞識，話佢係繼隊友羅意庭之後，最有潛質去國內發展嘅本地球星。
其實紅軍班主洪生噚晚喺銅鑼灣一酒店舉行嘅慶功宴席上，都大讚Duncan表現非常之好，係球隊成功衞冕嘅關鍵。得到大家器重，呢位加拿大、香港混血兒都信心大增，並已訂下兩年計劃，勢要搏盡北上搵食︰「雖然自問仲有好大進步空間，但今年4月啱啱畢業，除咗教波同幫人補習英文外，亦有更多時間可以專注籃球。未來兩年會盡量去搏，練好自己，最希望可以去打CBA，就算去唔到，都希望可以去打加拿大，或者歐洲其他職業聯賽。」
永倫料簽楓葉國手
雖然今夏唔會有甲一前4互片嘅超級聯賽，令衞冕嘅南華未能爭做4冠王，但紅軍已為來季做好準備，當中下年喺香港住滿一年符合「居港球員」條例嘅加拿大射手余理洋，就最令人期待。適逢今季只屈居第3嘅永倫，來季亦好大機會簽入加國26歲國手Tyler Kepkay，勢掀起新一輪「華倫」大激鬥！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange