律政司司長袁國強一直被喻為現屆政府入面嘅鑽石王老五，究竟係咪真呢？政界元秋嘗試揭開謎底。噚日元秋見到袁國強準備離開立法會嘅時候，單刀直入質問袁國強有冇女朋友、係咪鑽石王老五？
雖然八方唔明白點解元秋有咁多嘢唔問，偏偏要關心呢個問題，但袁國強竟然一個轉身射個三分波回應元秋，佢先否認自己係鑽石王老五，繼而就話既然自己唔係鑽石王老五，因此唔需要回應有冇女朋友嘅問題啦，乘勢再話鑽石王老五嘅要求好高，所以自己唔係。袁國強果然係一位資深大律師，因為佢係唔係鑽石王老五根本就唔係重點，反而佢有冇女朋友呢個先係重點，但佢根本就冇答到囉。