恒生銀行（011）前一姐梁高美懿憤青上身？！梁高平日好少大力月旦時事，噚日出席一個有關前海發展嘅研討會，只做聽眾，被問到政府應否收回粉嶺高爾夫球場等城中熱話，佢竟然有話說，擔心政府收地令香港少咗一個特色；又批評香港不斷內耗，影響喺前海嘅發展。
評前海發展太慢
金融發展局噚日舉辦前海金融發展機遇研討會，好多財經界人士出席，如大新銀行（2356）太子爺王祖興、財資界人士陳鳳翔、金銀業貿易場理事長張德熙等，梁高都係聽眾之一，佢謙稱，世界變得快，一定要繼續學嘢咁話。
問到前海機遇對香港有幾大幫助，梁高雖然擺出招牌笑容，但就話「前海發展太慢啦」，指橫琴發展得快好多，人哋啲政策一落實就去馬，前海就發展得慢好多。佢認為香港人應該減少內耗，主動向外發展，作為國際金融中心，香港應該主導前海發展金融先啱。
本身係高球場會員
梁高又主動提到最近城中熱烈討論嘅其中一個話題：政府應否收回粉嶺高爾夫球場，用作興建房屋。梁高雖然係會員，但就話，唔係怕政府收回呢塊地之後，以後少咗個好地方打波，而係擔心香港又少咗一個特色。相對區內競爭對手新加坡，當地同樣有好多高爾夫球場。
梁高認為，政府要收回呢幅地都得，但起碼要搵到第二塊地建新場先。唉，家陣政府就係話唔夠地起樓，周圍搵地，搵到地都起樓，點會起高球場呢？未俾人鬧得夠嗎？
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange