埃及出現實質上嘅軍事政變，軍隊逼令民選總統下台，將佢軟禁，視民主程序如無物，當然係軍人干預政治，一般而言，會受人民反對，受國際指責。
但埃及軍方堅持冇搞政變，指趕走民選總統莫西，係與廣大的埃及人民站在一起追求改革，而且據說有多達一千四百萬人上街要求莫西下台，故此軍方呢個行動廣受歡迎，人民上街慶祝㖭，故此國際間對埃及軍方是否搞政變，一於視而不見，含糊其詞。
政變一詞，由法文coup d'etat而來，英文coup解釋為一小撮（small group）具備武裝或政治力量人士突然強逼政府下台嘅行為。如果埃及軍方係搞政變，美國每年向埃及提供十五億美元嘅經濟及軍事援助，根據美國法律，就要中止，大大降低美國對埃及嘅影響力。美國參謀總長就警告埃及軍方，如果有政變之實，後果嚴重，但埃及軍方就堅持趕走莫西係廣大埃及人民願望，並非一小撮人嘅行為，而且臨時執政嘅政府係一個文人政府。
無論點講，鐵一般的事實就是槍桿子出政權。左丁山幾年前就同泰國同學激辯，指泰國人選咗他信上台，黃旗軍就唔應該上街示威，要求他信下台，甚至暗地裏與泰國軍人勾結，搞政變趕咗他信，卒之令泰國政治亂局持續幾年，完全破壞民主程序。成熟民主體系有一個說法，就係等到四年後或五年後直選，就以選票趕走不受人民歡迎嘅政客，所謂vote the rascals out，堅持用選票趕走壞蛋，不用暴力，不用槍桿子，方可保證民主制度持之久遠。否則選咗黃衫，紅衫示威，選咗紅衫，又到黃衫示威，如此沒完沒了，國不成國。埃及現在走上泰國道路，去年51%選票選咗莫西做總統，點知此人上台後專制攬權，誠埃及之大不幸，現在埃及趕走莫西，佢嘅支持者兄弟會就上街搞暴亂，意味着埃及軍人先至係操控埃及政局之造王者，文人政府指揮不了槍，何來真正民主？寫到呢度，無法子不向台灣軍人致敬，所謂國軍其實最初係蔣介石掌控指揮大權嘅國民黨軍隊，去咗台灣幾十年之後，國軍逐漸演變成政府指揮嘅軍隊，脫離國民黨影響，陳水扁最爛時期，國軍亦緊守中立，不搞政變，尊重民主，於是台灣已可大步走入輪替民主選舉政府之列，成為中國華人民主典範。