八方同事日前揭發唔少高官任內收禮收到手軟，其中點名話商務及經濟發展局前局長馬時亨（圖），收過兩條珍珠頸鏈。肥馬噚日向八方呼冤，話冇私吞任何頸鏈，翻查文件後發現，喺08年5月，先後收到江西省政府送出嘅淡水珍珠頸鏈一條連胸針一個，以及湖南省政府送出嘅洞庭珍珠頸鏈一條，各值約400蚊，佢話當時並無留為己用，而係轉贈畀辦公室同事抽獎，仲留有電郵作證。
肥馬又話，其實唔少局長都好似佢咁，收咗平價禮品之後，其實都係用番喺自己個政策局，喺聖誕或大時大節搞聯歡Party時捐畀同事抽獎，唔係貪心。據知唔少司、局長收咗啲紅酒，都係畀同事開P時慢慢嘆。