張曉明同立法會各黨派午餐，不必奇怪，有學者分析會貶低特首，其實特首地位之低，又何須由張曉明來貶抑，佢本人已不斷自貶地位，香港人睇見眼冤。
首先「內交外交」地位佢係歷任最差一位，訪美華府冇人理，竟然自己吹風話拒見奧巴馬，笑死冇命賠，留在紐約連市長彭博都玩佢，早上會面取消變成路過拜訪。
如果真係有北京力挺，憑中國駐美大使安排，又點會華府一條友都見唔到。至於上次海參崴APEC臨時被取消改由財爺頂上，就更加冇面。佢上任表示大搞內交，兩會前述職連發改委及商務部都安排唔到，要返來後再安排去多次。內交工作亦睇唔到有乜進展。
特首自吹自擂 貶身價
反觀香港人唔多留意，財爺6月率商貿團去緬甸及柬埔寨，接見規格係總統吳登盛及首相洪森，財爺自己透露，「柬埔寨商業部部長Dr.Cham Prasidh是我認識多年的好友。」兩人原來在十年前，在非洲贊比亞世貿MC6會議上認識。特區財金系統官員，同習主席左右手政治局常委王岐山亦是朋友，內地人脈比梁振英更多，至少仍然在位，而非退休人士。
特首在內政方面，政改變人肉錄音機，𠵱家明顯由張曉明主導，梁無能力去同泛民打交道。
最近楊劍兄在《東周刊》專欄一篇名為〈我們都是王國興〉，分析獨到，指梁振英一年工作滙報，走上了十幾年前王國興仲係區議員時，事無大小都自吹自擂成功爭取的舊路，自貶地位。區議員就話要代表市民向政府爭取利益，特區大權在握，點會變成區議員，自吹自擂，自甘墮落。大佬，今日王國興做咗立法會議員，都唔再用呢種訪貧問苦，「為人民服務」老土形象出來行。
政客重視社區福利活動，但更重視全港重大議題論述，梁振英在政改問題上完全俾林煥光搶晒，林煥光所言，不過是政治分析ABC，但一對比梁之「失語」，就高出幾皮。至於重要政策，包括佢掛在口邊之「適度有為」，其變成政策後操作定義係乜，至今無人知曉，第一份施政報告，稍為概念化的政治及政策論述都欠奉，變成區議員工作報告，身價貶值，其實係力有不逮。
中方八九十年代培育之精英，最大缺失是過去十年，並冇與時並進。呢十年全球政經出現大變革，群眾政治抬頭，社會動員力大增，新媒體為人民充權，社會更重視價值辯論、理念掛帥。Out咗就係out咗，與人無尤！講真，經過立法會歷練，王國興醒過佢多多聲。
添馬男