出得嚟行，預咗要還，相信應邀喺下周二出席立法會午宴，試圖同泛民溝通嘅中聯辦主任張曉明，已經預咗屆時會被泛民以不同形式嘅抗議方法同物品「恭迎」，八方聽聞張曉明其實已做好迎戰心理準備，佢個人最關心查實係呢場親泛民騷，一定要做得好睇過狼英。
從容面對請願遞信
有政界中人話成功做媒人，邀請張曉明去立法會宴會廳泛民午宴嘅立法會主席曾鈺成，近日表現風騷，同唔少議員爆拉線內幕，引述張曉明講到明，嚟得立法會作客，預咗有議員遞信或請願，佢一啲都唔介意，多啲嚟、密啲手，反而最在意係一定要做得好睇過狼英喎。原來張曉明覺得傳媒一定會攞佢同狼英比較，睇吓邊個應對泛民更耍家。查實狼英早前喺立法會午宴中，一直將趨前遞信嘅長毛當透明，八方相信張曉明只要接多幾封信，輕易將狼英KO啦。
張曉明噚日去到民建聯21周年黨慶晚會時，話未係時候同議員喺下周二傾政改喎，而佢噚日同狼英及三司同場為民建聯賀壽時一直笑口噬噬，可能諗起有得同泛民溝通，未食飯、先興奮，但毓民表明杯葛，兩人無緣碰頭咯。
呢班主禮嘉賓噚日為民建聯切蛋糕時，蛋糕上民建聯個招牌冧咗，認真大吉利是，好在林鄭月娥眼明手快接住。曾鈺成事後搞GAG兜番話該黨跌過輸過無數次，最叻咪就係識得企番起身囉。輸過咁多次都仲敢出賣香港人，抵你牙擦。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange