剛奪得溫網男單冠軍嘅英國球手梅禮（中）可以話忙到爆，周日先玩到成凌晨3點，但係第二日一早就去接受傳媒訪問，唔怪得講講吓都要打個喊路，真係冇陰公。晏晝佢仲出席贊助商adidas嘅活動，同一班小朋友打網球，之後又去唐寧街10號見英國首相卡梅倫（右），夜晚又同經理人富拿食飯，最慘嘅係一食完飯出嚟就遇到班球迷，個個為咗拎簽名無所不用其極，係咁「隊」本書畀梅禮，打面插鼻咩都出齊，搞到呢位溫網英雄面容扭曲，睇到都覺得痛。
至於輸咗嘅塞爾維亞「1哥」迪祖高域，同日都照出席自己名下慈善機構搞嘅慈善晚宴，仲同女友列絲迪一齊出席。當晚可以話星光熠熠，唔少明星都有出席，就連德國網球名將碧加都有到場。