因為堆填區擴建爭議，環境局局長黃錦星呢排頻頻出鏡，相信唔少市民開始認得，呢位喺行會成員兼新民黨主席葉劉淑儀口中「木訥啲」嘅局長，究竟係乜東東。吖，點知睇睇吓，開始有政界中人話，唔知點解覺得黃錦星好鬼面善，但唔係同某個人相似喎，而係有啲似一個卡通人物，仲話不時喺電視見到㗎。
日前有班政界中人再講起呢個人有相似問題，有人諗諗吓，終於「叮」一聲發現新大陸咁大叫：之唔係就係嗰隻「大嘥鬼」囉！啊，原來係宣傳惜食運動政府短片中，眼闊肚窄浪費食物嗰隻「大嘥鬼」。有人即時上網look一look，睇完笑住問：環境局係咪照住黃錦星個樣去設計？單憑呢句就知相似度啦。政府如果要設計源頭減廢吉祥物，係咪應該以狼振英為辦呢？