一句「苦等十年，只求觀眾講得出我個名」，無綫藝員鄭俊弘喺《星夢傳奇》第一集表現出色，成為高分王，節目出街後成功彈起。噚日鄭俊弘到新城接受訪問，之後有成6、7個記者訪問佢，佢第一時間拎起手機影相留念，好興奮咁話：「我第一次做訪問，好想拍低佢做留念。」可惜無綫竟冇派人嚟採訪。鄭俊弘話：「感覺好似發夢，出到街好多人鼓勵自己叫我個名，錄影時冇諗過有今日反應。」
幫口撐無綫
有指《星》嘅錄播版本cut晒梁烈唯同黃智雯被巫啟賢狠批嘅片段，鄭俊弘幫口解釋：「可能出街版本有時限，所以保留大家演出片段，而刪走以外片段，我贊成網上播足本版，等觀眾睇得更原汁原味。」嚟緊播出嘅第二集，巫啟賢話請鄭俊弘做今個月27號喺會展舉行嘅演唱會嘉賓，而嚟緊禮拜日佢會錄第三集，問有冇信心？鄭俊弘話：「都係唱好首歌，仲有兩個新參賽者加入。」講到有指評審有造馬之嫌，佢話：「唔覺，大家都好真實，評判加現場觀眾都冇得造馬。」問有冇諗過出碟？佢話：「諗就成日諗，平時都有夾band同創作，暫時未有唱片公司招手。」
另外，講到「卡拉之星」鄭世豪喺網上指入選準則有好多數要計，鄭俊弘話自己唔識計數。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange