大市chok上chok落，成交越縮越小，睇恒指日線圖，已行至三角形末端，隨時出現突破走勢，有乜消息可以令個市突破悶局？不外乎明日凌晨出籠嘅聯儲局會議紀錄、主席伯南克之後喺經濟研究局發表講話，以及下周一內地公佈嘅第二季GDP數據。
近期大熱嘅李克強經濟學，主調為調控經濟結構，重質不重量，以往天量放水救經濟嘅政策，已成歷史，錢荒隨時由「問題」變為「常態」，非受惠國策嘅中資板塊，在去槓桿化過程中，肯定易跌難升，戰友們少掂為妙。
不厭其煩再推介美國復蘇概念股，事關資金明顯停泊在花旗國，早前聯儲局嘅退市言論只惹來震倉潮，卻未有改變美股撲頂走勢。創科實業（669）公認為頭號美國復蘇概念股，經過個多月調整後，近日成功突破下降軌，噚日即市更衝穿50日線，配合美國樓市強勁數據，隨時展開新一輪升浪，現水平可能係最後嘅上車機會，戰友們請好好把握。
唐牛