社協前幾日約埋幾位立法會議員夜訪油麻地渡船街露宿者，身兼港區人大代表嘅馬逢國罕有應邀出席，仲同露宿者排排坐聽佢哋訴苦。之不過佢一開口就露饀，事關佢同露宿者講喎，油尖旺區屋租貴，點解唔住遠少少，例如住天水圍，咪會平啲囉！聽完呢條問題，社協幹事吳衞東都即時O嘴，嚇到停咗幾秒先向佢解釋詳情。
實情係：基層市民多數喺油尖旺區打工，因為交通費太貴，迫於無奈要捱貴租住番呢區，呢個情況已經講咗好多年喇，估唔到馬議員仲問得出口，𤓓咗啲囉。唔講未必記得，佢其實係立法會民政事務委員會主席嚟㗎，如此不知民間疾苦，唔知可笑定可悲？