陳山聰做戲其實唔差，好似舊年無綫監製李添勝嗰部《天梯》，陳山聰飾演嗰個藥廠老闆黎濟民真係幾可愛，可惜佢拋棄糟糠Ponny同咗賭王千金何超雲拍拖，搞到形象插水，加上之前佢同超雲拍拖嗰陣成日請假推job，搞到好多無綫監製都買佢怕，唔敢再搵佢開劇。
未清楚未來方向
不過，原來最近有位無綫金牌監製想出手打救四失聰，呢位就係曾經拍過《烈火雄心》、《天幕下的戀人》同《真相》，有份捧紅鄭嘉穎同陳展鵬嘅王心慰。聽聞佢見陳山聰一直坐食山崩，所以下半年佢開拍一部時裝劇，諗住搵陳山聰去做一個戲份都好重嘅角色，點知陳山聰唔領情推咗，原因係佢自己都未清楚自己未來方向，所以唔想拍劇住喎。
日前向無綫製作資源總監樂易玲求證，佢承認有咁嘅事話：「王心慰新劇係想搵陳山聰，但陳山聰話需要時間計劃佢嘅發展空間，所以暫時佢唔想拍劇住，話好多謝公司同王心慰畀機會佢。」
對於推無綫新劇，陳山聰日前喺電話回應：「我唔回應呢啲嘢，唔好意思。」而王心慰噚日話唔覺得陳山聰唔領情：「人哋有原因唔得，佢有佢自己嘅選擇。」
究竟原本想搵陳山聰做乜嘢角色？部劇故事講乜？以及有邊個小生花旦做？王心慰話：「佢都唔拍，講嚟都冇用。至於部劇好多嘢未落實，唔方便透露。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange