恒指昨升100點看似回穩，但H指仍跌12點，下跌股份約600隻，比上升股份約500隻仲要多，反映市底唔算強。而升逾5%嘅股份就有64隻，但熱門股欠奉，至於51隻跌逾5%股份中，就有安東油田（3337）、瑞聲（2018）、合生（754）、南車時代（3898），反映大戶出緊貨多過儲緊貨。
債重股仲係弱雞，華能（902）雖升3%，中建材（3323）、中鐵（390）、國航（753）、南航（1055）就跌1%至3%，資金主要買入相對穩陣嘅本地地產股、高息股，同負債比率較低嘅中石化（386）、中石油（857），沽售高風險股情況未見改變，換言之，債務危機仲未過去。
重債股嘅股價強弱，似乎為債務危機展開序幕，股價最弱嘅中建材，去年扣除現金後淨負債比率434%，噚日繼續尋底。情況好些少嘅玖龍紙業（2689），低位輕微反彈，市場驚緊重債股會隨住高負債同低盈利能力陸續出事。
賺埋唔夠畀息
中央近期講明大家要勒緊褲頭，國家機關削減支出5%，即使唔再出現新一輪危機，部份國企都可能過唔到重債嗰關。當然，個別企業好似中建材、中鋁（2600）咁大到不能倒，究竟阿爺會點樣幫佢哋過難關？如果要發換股債之類，令股權大幅攤薄，情況就似足金融海嘯嘅北美銀行股，股價隨時跌到一文不值。
撇除金融股，H指成份股嘅2012年底平均淨資產負債比率去到69.5%，當中有四成股份財務費用佔純利四成以上，經濟再差啲，賺埋都未必夠畀息，連鎖反應之下，金融股同樣會受企業重債拖累，再借落去只會令個別國企爆煲，情況更加失控，唔借落去，貸款需求減少就足以令利潤掉頭下跌，可見H指成份股前路茫茫，亦解釋到H指點解跌到咁殘都彈唔起。
晉佳
本欄逢周三、周五刊出