噚日睇見LVMH斥資200億元，收購意大利羊絨製品零售商Loro Piana八成股權呢單新聞，即刻諗起一件瘀事。
成皮嘢一件冷衫
話說早排約咗財經專欄作家周顯食晏，係人都知佢捨得使錢，席間問佢平日最多使錢喺邊度，見佢身穿風褸、T恤、牛仔褲，唔似係貪靚、鍾意花錢喺衣着上面嘅男人，估佢多數花費喺飲食、玩樂居多。
唔講尤自可，一講就知瀨嘢。佢即刻一輪嘴咁介紹周身名牌，身上着住嘅正是Loro Piana T裇，要成3,000元一件（摸落的確幾滑）。佢仲係呢個牌子嘅粉絲，家中衣櫃裏面，所有T裇都係呢個牌子，過萬元一件冷衫亦有存貨，認真失覺晒。
呢個故事教訓華華，以後問人哋私人嘢都係簡短啲，咪講諗法，仲要刨熟時裝雜誌囉！