賭王二房三女何超蕸通常喺名人版出現，舊年突然話入股咗創業板公司川盟金融（8020），公司噚日宣佈佢增持至15.14%，不單止係第二大股東，仲做埋主席兼執董。呢間公司仲話計劃賣保健品同對抗愛滋病藥物，成件事都好估佢唔到囉！
持股量升至15.14%
川盟做開企業融資顧問，舊年入股一間何超蕸有份嘅藥物公司，因而披露何超蕸持有川盟逾4%股權，佢近日以4,000萬元向大股東買入約一成股權，持股量升至15.14%。大股東黃錦華嘅持股量就降至43.24%，唔做主席，只做行政總裁。
何超蕸今年45歲，係信德（242）執董，負責物業管理、零售同推銷規劃，另有一籮社會公職，包括東華三院第三副主席、伊利沙伯醫院管治委員會委員、香港女童軍總會名譽副會長等等。