中環在線:超級轉工王 擁30個MPF戶口 - 李華華

中環在線:
超級轉工王 擁30個MPF戶口 - 李華華

積金局噚日搞傳媒飯局,席間宣佈由舊年11月至今,共收到7萬幾份半自由行強積金(MPF)轉會申請,機構事務總監鄭恩賜唔評論數字係咪理想,但今年該局會有新搞作,幫打工仔整合基金。
積金局計劃9月開始,向持有4個或以上MPF戶口嘅打工仔,寄出「點心紙」form,打工仔只要喺表格上點菜,剔出將邊啲戶口整合同轉移,然後寄畀心儀嘅受託人公司,就可以一次過將手上戶口化繁為簡。
據積金局資料,有20萬人擁有4個或以上MPF戶口,其中一位仁兄竟然有30個戶口,稱得上超級轉工王。至於有8個戶口或以上嘅打工仔,就有3,000幾個,積金局早喺3月寄信,向呢批打工仔溫馨提示,結果約有7%(200個)成員整合戶口。