「萬人迷」碧咸5月宣佈退休後，過住休閒生活，之前去強國宣傳中超搵吓人仔，趁英超未開鑼，周一晚就去咗曼徹斯特市Artisan Bar & Restaurant，搵番一班曼聯「7小福」舊隊友聚舊兼蒲吧，蒲天光後一行6人行出嚟，好似拍緊《古惑仔》咁有氣勢。
碧咸同呢班92年幫曼聯贏青少年英足盃嘅隊友，合稱「7小福」，發展比較差嘅泰利曲基就冇出現。經過廿幾年洗禮，6人都洗盡鉛華，不過最搶鏡仲係咸哥，一件綠色格仔恤都型過人，蒲完個頭仲keep到咁挺。尼維利兄弟就薯啲，加利佬進軍地產業，件白恤衫就好老餅，菲臘佬就埋到莫耶斯堆，做到紅魔一隊教練，但呢身恤衫西褲，好似返銀行工咁。
碧咸返到曼市，早一日仲去到曼聯官方店狂掃20冠紀念衫！唔知專賣店有冇畀番個員工優惠折扣佢？
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange