阿里巴巴集團創辦人馬雲兩個月前，將CEO一職交畀陸兆禧，阿里入面，每人都有個花名，陸兆禧嘅花名係「鐵木真」。呢位大汗噚日首度來港講解公司發展策略。相比馬雲口水多過浪、鍾意着鮮色衫，大汗說話明顯樸實好多，只以一套深色西裝示人，兩位CEO分別頗大。
從二人花名可略知二人風格，馬雲叫「風清揚」，係《笑傲江湖》裏面嘅隱世高手，似係自喻身處幕後嘅IT界高人。陸兆禧就係好打得嘅話事人。
陸兆禧坦言，喺阿里工作13年，期間好多人將佢同馬雲作比較。佢認為，馬雲嘅眼光好高，好多時可以將聽落好似好虛無飄渺嘅嘢，透過佢嘅影響力，變成事實。
陸兆禧自謙講嘢唔叻
而且馬雲確實吹得。陸總話，同馬雲合作多年，佢諗到嘅嘢，馬雲好多時都諗到；馬雲想講嘅嘢，就係佢想講嘅嘢。當中最大嘅分別，係佢講嘢唔叻，好多時由馬雲把口講出嚟，陸總帶領團隊落實執行。
阿里內部，普遍認為陸兆禧最大特點，係低調同說話速度緩慢。佢13年前加入阿里，員工編號129，代表佢係第129位加入阿里嘅員工。
叫得鐵木真並非浪得虛名，佢除咗開辦淘寶，過去曾多次出任救火隊隊長，其中一次，係2011年阿里巴巴B2B業務爆發大規模造假事件，衛哲引咎辭職，陸兆禧臨危受命接任CEO一職收拾殘局。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange