盛智文對工作嘅狂熱，亦感染到阿仔Jonathan。Jonathan兩歲移居香港，精通中英文，1998年美國大學畢業，就喺蘭桂坊工作，由餐廳侍應做起，之後做過多個部門，舊年升任集團CEO。
做CEO後拋頭露面
Jonathan向來比較低調，自從升任CEO，亦不得不跟盛智文多咗拋頭露面。佢透露，一星期至少要到內地一次，成都、海口、無錫蘭桂坊，通通要負責，好在佢「非常認同阿爸嘅工作理念，我已經做咗十幾年，好開心，冇諗過要走。」
盛智文雖然係蘭桂坊之父，但本身滴酒不沾，仔女飲唔飲，佢就冇理。盛智文話：「佢哋有自己嘅選擇，我唔會過問。」佢舉例，「女兒想做設計師，我叫佢自己揀，冇迫佢留喺家族生意。如果Jonathan有一日唔想做，我都冇所謂。」