陳智思最近不斷同人講，佢不要做特首，對報紙鄭重聲明：「商界有遊說，北京叫我去也無情講」。一個人不斷講唔要，唔會做特首，總係令別人生疑心嘅，尤其是現任特首曾經講過：「第N屆都唔會競選」㖭，但係左丁山聽一位學者講過，陳智思嘅民望高過梁振英，坐在行政會議內，不能不令梁特首生疑。況且陳智思身家清白，父親陳有慶係北京看重，信得過嘅人物，在東南亞華僑圈子好有聲望。東南亞大商家，有邊個唔領過陳弼臣（陳智思阿爺，盤谷銀行創辦人）嘅恩惠，或創業維艱時期，向盤谷銀行借過錢呀？印尼華人首富林紹良嘅旗艦公司PT Indocement在三十年前，就由盤谷銀行人員掌管財務部啦。
正因如此，陳智思可能係一個2017年特首普選嘅候選人，若中央諗出絕橋篩選候選人，係要唔俾民主派入閘嘅話，唔通只係允許一隻馬跑咩，好肉酸嘅啫，整色整水都要搵兩三個特首直選候選人出嚟，譬如係梁振英，葉劉淑儀，與陳智思三個競跑，任市民揀，呵呵，一個唔覺意，咪選咗陳智思出來囉。梁振英最想嘅係到時梁振英對鍾樹根，咁就得米咯。
根據中國傳統，未登位嘅太子好危險，易招大禍，故此陳智思一定要否認有意思競選特首，左丁山亦親耳聽過幾次，佢老竇陳有慶好唔想陳智思考慮競選，請傳媒放過佢啦，否則繼續吹風嘅話，容乜易逼到陳智思呢位好人辭去所有公職，以示清白！
中共不怕特首直選，只怕真正直選，最怕民主派有人參加直選，直至諗到方法可以合法擠出民主派候選人之前，一定冇政改諮詢方案，呢啲嘢唔輪到梁振英話事。譚惠珠話各國皆有篩選，並無講錯，但人地係由選票篩選嘅，並非由委員會篩選，如果譚惠珠想學伊朗，令到三位候選人都係建制派嘅話，不妨去德黑蘭取經，立即起程吖。爭取真正民主選舉，鞏固民主制度並不容易，埃及就係一個令人傷感嘅例子，埃及人民辛辛苦苦爭取到歷史上第一次全民投票選出總統，點知一年後就歡迎槍桿子，讓軍人干政，可哀也。