個市日升日插，對做財經新聞的魏力是一種精神煎熬，明知睇多無謂，但唔睇又發掘唔到新聞，個專欄更冇米落鑊，惟有學習平常心面對。中港股市全球最弱，因阿爺隨時硬着陸，加上企業盈利遜預期，之前炒凸咗，調整番好正常，整體仍是有秩序向下，亂掟貨、狂斬倉的情況仍未出現。有貨的戰友，請盡量趁反彈減持；冇貨的話，恭喜您，請繼續企埋一邊，耐心等埋最後一跌先入場。
股份方面，鐵膽網龍（777）、金山軟件（3888）及中集安瑞科（3899）仍硬淨，強者越強，食粥食飯睇佢哋。其他持貨都只能隨大市飄流，當作分散風險。值得留意，中集安瑞科昨現7.7球大手上板，均價12.20元，較現價更高，情況罕見，是否有後着要拭目以待。
另外，大陸錢荒蔓延，越河蟹代表越大鑊，債重股（尤其是資源股）絕不宜沾手，據悉唔少民企已處於執笠邊緣，熔盛（1101）資金短缺只是冰山一角，千祈咪貪平博反彈，因為風險與回報絕不成正比。
經過近月拋售潮洗禮，圖靚的股份甚少，同仁堂國藥（8138）是其中之一，似在形造杯柄形態，昨突破10日線向上，貨源歸邊易炒上，戰友可待突破高位11.86元後小注追入，睇13蚊。
魏力
http://www.facebook.com/2012jason
本欄逢周一、二、四、五刊出