美國前財長蓋特納今年1月離開官場後，四出講talk搵真銀，最近三場演講就淨袋40萬美元（約312萬港元），身價同美國前總統克林頓同英國前首相貝理雅睇齊，躋身貴價講者之列。
退休高官有市有價
英國《金融時報》披露，蓋特納上月去德銀年會發表演說，淨賺約20萬美元；加埋早前應承兩隻私募基金講talk，每場賺10萬美元，豬籠入水。
據聞，克林頓同貝理雅卸任後，齋講talk已經賺咗過百萬美元，可想而知前政府官員講talk真係幾好搵。
不過呢類搵真銀方式都唔係人人接受，今年3月退任嘅日本央行前行長白川方明就講過，至少半年內都唔會就過往工作內容發表演說，費事得罪前同事咁話。