大市chok過林峯，郁啲就隊幾百點，心情難免忐忑。想搵正能量？早幾日香港機場為慶祝15周年，有關方面安排機管局、國泰（293）、地勤等300個機場員工，喺接機大堂表現快閃舞，段片可以喺YouTube搵到，睇完包你開心番。
今次機場宣傳方法確有驚喜。香港公司一般比較保守，對社交媒體有保留，最怕係用咁多人力物力去搞呢個show，到頭來冇人share得個桔。人冇我有情況下，香港機場就出奇制勝。
當然，睇得出揀歌有心思，全部都係耳熟能詳嘅歌，《江南style》呢類網絡紅到發紫嘅歌就唔少得。
揀歌入屋，跟到潮流，令機場畀到人年輕感覺。
至於令段片有feel，最重要係參與表演嘅公司，大大話話有13間；上網搵多幾段片去睇，就更發現唔止後生仔，仲有部份叔叔、嬸嬸輩員工，都極度投入去扭動身軀。不分公司、不分老中青一齊做一個有水準嘅表演，咁熱血，抵香港機場贏啦。
Fifi
本欄逢周二、四刊出