盛產精英運動員嘅香港體育學院，近日因有運動員感染手足口病並引致退賽而引發逃亡潮！病源由壁球隊蔓延至乒乓球隊，難怪乒隊總教練陳江華噚日領軍返港時，勒令隊員暫時回家「避難」。不過，正在體院練水的「國寶」孫楊卻冇有怕，繼續秘密訓練。
「反正亞錦賽後，我都打算畀球員放番幾日假。原本喺體院住嘅隊員，會先返屋企，因為我哋都有球員中招，穩陣啲好。」陳江華口中指嘅中招球員，正是廿歲出頭嘅黃鎮廷，佢本來跟大隊喺釜山參加亞錦賽，但幾日前手腳出現水泡，兼且發燒，佢拍江天一嘅男雙原本入到8強，但最後都因病退賽提早返港。
唐鵬驚傳染大肚老婆
喺釜山同黃鎮廷同房嘅唐鵬，最擔心自己被傳染，因為佢太太帖雅娜已經有4個幾月身孕。唐鵬噚日返到香港，第一時間去睇醫生，之後先返屋企見太太。其實，聽講黃鎮廷喺釜山發病後，已經第一時間被隔離，唐鵬應該唔使太擔心嘅。
至於今次體院爆發嘅手足口病源頭，聽講係來自壁球隊，佢哋至今仲有包括歐詠芝、歐鎮銘、陳浩鈴及幾位青年軍未好番。「源頭」嘅男單壁球1哥李浩賢話，因為自己近兩個幾月南征北戰，曾4次坐長途機往返香港，導致抵抗力下降而染上手足口，估計之後就傳咗畀隊友。壁球隊原定禮拜四去天津參加東亞運男女子混合團體賽，但會否如期參賽今日會有定案。
孫楊照練水冇有怕
體院運動員事務經理陳凱蘭話，𠵱家喺體院宿舍有117名精英選手，仲未有新症出現，體院已加強衞生措施，包括每小時消毒及清潔所有設施，又叫唔舒服嘅選手唔好勉強訓練喎。不過，為備戰月底世界游泳錦標賽嘅孫楊，就繼續喺體院練水同解決三餐，完全唔怕病毒。
今朝9點，參加完印度亞洲田徑錦標賽嘅港隊，包括4x100米接力跑嘅奪金功臣將會返港，佢哋大部份都住體院宿舍，唔知田總會唔會叫佢哋避一避風頭呢？
手足口病知多啲：
主要透過接觸患者鼻或喉嚨分泌物、唾液、穿破的水泡或觸摸受染污的物件而傳播。病發初期，通常出現發燒、食慾不振、疲倦及喉嚨痛，手掌及腳掌會出紅疹，有時帶有小水泡，大部份患者在1星期內自行痊癒。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange