港股噚日被空軍突襲，新能源股又再次成為逆市「生還者」，光伏股龍頭保利協鑫（3800）升近4%，華電福新（816）仲炒高逾6%。升得咁勁，離不開「炒政策」！據聞內地已經準備好徵收碳稅，只係等緊通脹回落，政策就可以隨時出台，新能源股又可以借勢炒番轉。
美銀調升目標價
不過，炒光伏股的風險就較高，始終行業一方面要處理產能嚴重過剩問題，一方面又俾歐盟「強盜式」徵收重稅，就連龍頭協鑫前景係點都好難講。不如揀隻穩陣少少嘅華電福新！
美銀發表研究報告指，華電福新啱啱宣佈，股東會已經批准向母企收購福建可門二期發電項目，收益將於今年上半年入賬。估計該項目每年可以貢獻3億至4億元（人民幣．下同），而華電福新未來亦會有更多收購項目。
華電福新首季少賺46%至2.6億元，拖累股價由高位回吐，不過美銀預計上半年盈利料達8億元，即意味第二季已重拾增長動力。加上下半年水電價格有望上調的憧憬下，全年盈利料增加逾三成至13.6億元。故維持買入評級，並調升目標價至2.90港元。
經過五窮六絕後，華電福新都唔係跌好多，抗跌力夠晒強，噚日一支大陽燭升越20日及50日線，仲以全日高位2.30港元收市，要爆上睇嚟冇乜難度。
瑪姬兒