巴塞隆拿「球王」美斯雖然唔係「溝唔到女嘅可憐蟲」，有靚靚女友安東莉娜，女友仲幫佢生埋囝囝堤亞高㖭。不過美斯嘅宅男形象仲未改到，日前就趁住美國慈善足球賽嘅空檔，去到賭城拉斯維加斯一間酒店，出席「大哨」搞嘅比堅尼派對，但仍然怕怕醜醜，只喺一眾男士附近活動，唔知仲以為佢「性向成疑」㖭！
美斯喺美國搞嘅慈善賽，原定第2站洛杉磯因贊助商問題取消，芝加哥站則在上周六順利舉行，期間有啲空檔，去芝加哥前就獲大哨邀請出席呢個賭城泳衣派對，連前巴西前鋒查明夏都有份出席。
諗起破財冇晒心機
西班牙傳媒之後流出當時派對唔少相，雖然現場不乏三點式索女，但着住沙灘褲嘅美斯，就好乖仔咁坐喺梳化，同兩位哥哥吹水。美斯咁靜局，可能因為早前報道佢要為漏稅事件，將向西班牙當局補交1,900萬歐元（約1.9億港元），諗起將要破財，美斯仲邊有心情蒲！
貴為主人家嘅大哨就當然冇美斯咁純情，穿梭於美女身邊，就算個大肚腩返晒嚟，仲keep到人魚線，睇嚟都頗具魅力，加上佢滿場飛，自然搶晒美斯鏡。
肥哨：唔想尼馬去巴塞
美斯新一季就多咗位拍檔尼馬，肥哨效力過巴塞同皇馬兩間西班牙大會，甚至尼馬嘅經理人公司都係佢擁有，所以都發表一番偉論：「其實我希望尼馬去皇馬多過去巴塞，原因係咩就唔方便講。」不過既已成定局，肥哨都要講番句好話，盛讚巴塞係一支偉大球會，亦會令尼馬成為傳奇球員㖭。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange