大家作為〈金手指〉嘅fan屎，都知道孫柏文喺對上12個月減咗80磅。當我仲估自己係舊年減肥榜冠軍之際，呢排殺出多棲藝人龍小菌小姐，原來比我仲勁，減咗132磅。原本只係歌手嘅龍小菌，成功變多棲，最近見有海報賣廣告，原來仲會喺英皇教育開show，對象係中四至中六中文科嘅觀眾。
龍小菌除罩的哲學
點知新聞一出，呢位以前戴塔利班認可面罩、喺旺角行人區免費表演、啲社會棟樑估係冇銅臭嘅社會運動家，就畀啲冇能力謀利嘅傳媒單位瘋狂追打。
呢位𠵱家有舊年白眼鏡框黃洋達咁紅嘅龍小菌，就令我諗起哲學家黃子華嗰句說話，「搵食啫，犯法呀？」佢話減肥同去罩無關，去罩只係因戴罩令肺部呼吸有問題。如果你信，我都有啲民企股賣畀你！
不過佢除罩有個好重要嘅投資教訓要學。就係未修身前戴面罩，去控制投資者預期，當全城仲估你係豬扒後，修身除罩都唔使靚，勝預期就得，咁股價就會大升特升。
社會運動爭取公義，係一樣越來越多人明嘅道理。多唔使講，噚日恒指跌272點，美聯集團（1200）反升1.8%，原因可能係周日有一場2.3萬人參與、我有份做糾察嘅反特別印花稅遊行。
其實上周同民主黨單仲楷議員傾呢單嘢嘅時候，佢話自己就要政府為雙倍印花稅設日落條款，仲話會游說黨去支持。其他黨派亦有議員從管治效率角度（對樓價冇用之餘，仲令人更難上車，因啲上車盤業主冇得搬）想反對，開始問我哋獅子山學會如果要反，點sell？
不過今次遊行，團結美聯、中原、細行，反唔反到嗰三種印花稅我就唔知。但政府應該冇能力再加新款印花稅啩？美聯盈警都發埋，股價已挫，應該可以冷敲。一旦DSD撤，升鑊杰呀！
孫柏文
獨立股評人
http://facebook.com/shuen
本欄逢周二、四刊出