編按：是日由盧主席秘書Joycelyn執筆。
「唉！就咁死咗啦，真係慘。」Jennifer忽然長嘆一聲，嚇得我差點翻瀉手中的Moscato d'Asti。甜甜的酒香和調皮的小氣泡，在炎炎夏日，有甚麼比一杯冰的Moscato d'Asti更令人喜悅的呢？
「邊個死咗？你沒事嘛？」擔心姊妹有事，眾女急不及待地追問。沒想到Jennifer指指手中的Note，原來她正為兩條在三亞擱淺死去的海豚哀悼。豈有此理，又喺姐妹聚會online check新聞，呢位工作狂真係上網成癮喎，不過佢又唔係打海洋公園工，海豚安危點計都唔會係佢嘅職責範圍。
擱淺失救 顯國人麻木不仁
「Jennifer，乜妳唔係唔鍾意寵物嘅咩？點會為海豚難過㗎，仲要係三亞咁遠添！」咁樣拋出問題，好明顯呢名好事之徒不想過活了。雖然Jennifer平時冷血，對小動物冇乜愛心，即使睇煽情戲都唔流一滴眼淚，但係佢忽然感性並高聲長嘆，總有佢嘅道理。「其實海豚係好聰明、好有人性的哺乳類動物，你對佢做過啲乜，佢知㗎，佢有感覺㗎！」曾幾何時，小秘亦睇過一段日本人殘殺海豚的血腥片段，更看見海豚為遇害同伴而哭，慘不忍睹。
呢兩個月，在中國三亞發生了兩宗海豚擱淺事宜，而兩頭可憐的海豚的悲慘下場都是一樣：失救而亡。咁啱兩頭海豚擱淺的海灘，小秘都曾暢泳過，睇返當初認為是風光旖旎、青山銀沙碧水的風景照……唉，現在只覺毛骨悚然，彷彿聽到海豚哀嚎！
第一宗海豚遇難發生在今年5月，有一頭海豚擱淺在海棠灣沙灘，有救生員發現後即強把它推回海裏，以為海豚遇水即生，豈料又被大風浪沖了回來。在等待救援的幾個小時裏，十幾個見義勇為的遊人輪流下海拖住海豚，硬是不肯讓海豚着陸，還時不時將它抬起露出水面以便海豚呼吸，最後可憐的小海豚在送往救助站的途中死亡。死因是因為嗆水而導致肺功能衰竭，簡單一句，就係被淹死。
海豚用肺部呼吸，如果生病或處於十分虛弱的狀態繼續留在海裏便會有淹死的可能，所以它們就會停留在海灘休息，也是我們所謂的擱淺。這其實是海豚自救的方法，偏偏自作聰明的救生員把它從沙灘推回海裏，令到海水進入其背部的呼吸孔，最後弄巧反拙，教海豚枉死。所謂不知者不罪，且仍是見義勇為，抱有一腔拯救生命的熱血。但在6月中旬發生的海豚失救事件，卻充份暴露國人的自私和不仁。擱淺的海豚竟遇上聞訊湧至的三姑六婆，拿出手機拍攝之餘，更甚者將受傷海豚抱起合照，並大舉V手勢，即時放上微博炫耀。已經奄奄一息的海豚，怎耐得這麼多湊熱鬧的折騰，最終難逃劫數。
「來生不做中國人」又豈只是不少國人的隔世宿願，強國任何物種，怕且來生輪迴做乜都好，只求能逃離神州這眾生遭殃之地。
Joycelyn