香港船王趙從衍家族之後、趙世光同邵氏影星何琍琍所生嘅長女趙式明（Sabrina），接受《福布斯》中文版訪問時透露，佢10年前加入家族企業華光船務之前，根本冇諗過做企業家，反而諗住好似阿媽一樣，工作幾年就搵一個喜歡嘅人結婚，相夫教子做少奶奶。命運偏偏要佢行另一條路。
原想學阿媽做少奶奶
Sabrina加入華光前做投行，入公司只係諗住幫輕阿爸，而且一直以為細佬趙式慶係接班人，點知細佬冇耐離開公司，走去搞文化保育、武術推廣。佢身為長女，唯有堅持做落去。2010年趙世光中風入院後，佢接掌公司營運，今年初做埋主席。
為公司拚搏多年，Sabrina今年38歲，三個細佬妹都已經成家立室，反而佢仲未嫁出，好在有愛情滋潤，男友係年紀比佢細16年嘅邱德根孫仔邱華瑋，正在譜「姐弟戀」。莫講話上流社會，普通人眼中，年齡差距咁大嘅姐弟戀應該都幾爆！