【本報訊】由地產代理業界牽頭組成的「辣招苦主大聯盟」，聲言政府連串推出多項打壓樓市措施是爛招，昨發起史上業界首次大遊行，2.3萬人高呼「切除辣招」。經紀上街逼政府跪低，卻遭市民鬧爆。有人認為，樓價不跌，反映辣招不夠辣，應該「加辣」，並非撤招。
記者:朱連峰 陳家雄
大聯盟公佈昨遊行人數多達2.3萬人，維園出發前逼爆「個半」足球場，警方則估計遊行高峯時有5,500人。中原地產稱有2,000員工參與，立法會議員謝偉俊更與「白姐姐」白韻琹情侶檔現身撐場。出發前，大聯盟召集人朱建蘭呼籲眾人要團結，又鬧爆梁振英政府「鬼祟」，「知我哋搞遊行，就搵梁粉開盤」。被視為「梁粉」的鄭家純，旗下新世界（017）突擊開賣元朗溱林。
遊行昨早上約10時15分出發，遊行期間高舉不同反辣招標語，包括「3D阻換樓」、「打稅害民生」、「辣招阻上車」及「亂策未助民，苛稅顯無能」等，整個遊行在和平及有秩序的氣氛下進行，約11點50分抵達政府總部，由政府代表接收請願信後，遊行人士在政總門口踩爛三隻辣「椒」，強調重稅將令多達2,000間代理行執笠，過萬名從業員失業，受影響家庭難以估計。
關焯照：絕對不可撤招
政府無動於衷，企硬不撤招。政府發言人稱，明白業界對政府推出需求管理措施的關注，但強調為遏抑市場亢奮表現以確保市場健康平穩發展，政府有必要在非常時期推出有關措施。當樓市回復正常，將調整或撤銷有關措施。
經濟學者關焯照認為，現樓價水平，市民仍難以負擔，絕對不可撤招，市民的供樓負擔能力須至少下降兩至三成，才可考慮放鬆調控。他又不支持代理上街表達不滿，因為樓市旺起上來，地產經紀可以「賺到你唔信」，一個簡單經紀可以賺過百萬元的佣金，相比他們學歷，這是「好勁嘅人工」。並指現市況稍為不好，他們就不滿，那市況好的時候，他們是否「分番啲畀市民」。
施永青：中原或要縮舖
中原集團創辦人施永青指業界團結上街，反映辣招對行業打擊之大，行業七成運作停頓，中原更可能要縮舖。而受外圍影響，美國一旦退市而金融市場出現大轉變，小業主想離場卻被辣招綁死，有如「戲院火燭，你又唔畀人郁」，將來政府在政治上犯上嚴重錯誤。
議員林大輝直斥政府的辣稅未能令樓價下跌，不但幫不到市民置業，並產生很多副作用，包括增加失業率，形容措施「未見其利，先見其弊」。
有市民對行動不表支持，網民更鬧爆。市民黃小姐指如果撤銷辣招，擔心樓價持續上升。從事銷售的吳先生亦不支持代理遊行，「如果樓價高企，市民買不到樓，一樣冇成交，冇佣分。」
本報昨日即時以電話成功訪問180名市民，超過一半市民不支持代理上街抗議行動，另接近七成市民認同辣招可初步為樓市降溫。
【市民反應】
不贊成撤招
黃小姐：「代理生意唔好，好同情佢哋。對於撤走辣招就唔會支持，因為辣招的確可令樓市冷卻，擔心撤招反而令樓價持續上升，不利置業者。」
要打擊樓價
吳先生：「不應該逼政府撤招，因為政府要從廣大市民角度出發，要打擊樓價，如果樓價高企，市民買不到樓，一樣冇成交、代理冇佣分。」
【網民洗版 辣招唔夠辣】
Che Kit Lam： 遊行有甚麼用，啲官話之你。
Mo-Mo Yu： 政府應該加大辣招，樓價唔跌代表唔夠辣。
SAI HUNG WONG： 當中有幾多人係自願？又有幾多人受壓力下遊行？
WAI WONG： 辣招唔夠辣呀 ! 再辣啲 !!! 超級大辣勁勁勁辣 !!!!!
西門： 班地產佬成日喺到嘈，阻塞香港經濟發展。
ZEXY KAT： 香港是自由經濟體系，地產行業低潮，大可轉行，飲食業和扎鐵也大量請人，抗議甚麼? 你哋都有今日……
資料來源：《蘋果》網頁
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange