自從呢個夏天嘅田徑賽季展開後，飛人保特嘅風頭好似一直俾美國兩大跑手基寧同埋基爾蓋過；不過，呢名牙買加跑手終於喺上周六嘅鑽石田徑聯賽巴黎站一顯顏色，喺男子200米跑出今年最快嘅19秒73奪標（圖右）。
保特喺今次賽事發揮凌厲嘅後勁，喺轉彎後帶出，並順利以19秒73呢個今年最快時間兼大會新紀錄奪標。26歲嘅佢賽後話：「我對今場比賽好滿意。雖然我可以仲跑快啲，不過我對自己嘅表現已經滿意。」
「入魔」踢表演賽
令保特更加開心嘅，可能係終於畀佢恨到成為紅魔一員。據英國《太陽報》報道，喺8月9日英超球隊曼聯對西甲西維爾嘅里奧費迪南表演賽中，後衞里奧終於講掂新帥莫耶斯，畀佢邀請保特參賽。保特一直自稱為紅魔球迷，又曾向曼聯前領隊費格遜自薦試腳，佢話：「作為世界上最快嘅人，我知道自己可以對曼聯作出貢獻。」