年報對於唔少散戶，應該只得墊煲底同拎去回收兩個用途，但係認真啲睇，個別嘅封面設計都幾有趣。新近收到周大福（1929）同謝瑞麟（417）年報，封面又金又銀，話佢哋懶又得，有心思、襯晒公司業務又得！
謝瑞麟本年報嘅特色，除咗封面用上銀面，可以當鏡用之外，封底印有QR code，股東用手機掃一下就可以去到公司官網。雖然用得智能手機，都識得上網睇年報，但裏面有管理層同董事充滿青春氣息嘅合照，睇落屬有心之作。
係人都知佢賣金嘅周大福，就索性整個金色封面，一睇就知呢間公司做乜，讚佢夠一針見血，還是批評佢求其好呢？
據聞上市公司每年印刷年報少則20萬元，花錢起來，過百萬都有，散戶拎去墊煲底前，不妨望兩眼，睇吓董事每年袋幾多人工都好吖。