「小球場一班耆英，跑全場死捱……啤酒兩打隊晒，身己有得好快……」林海峰應該好鍾意踢波，兼且非常身同感受，先寫得出「男子組」咁到嘅「3字頭」球迷心聲。30歲就像一條界線，開始感到自己在球場跑得越來越慢、越來越怕曬、同越來越快冇氣。就算自己有心有力，你的隊友，亦漸漸會因為加班、陪老婆、湊仔、逐個遠離你；就算你仲唔放棄，積極搵腳，發覺得番後生10年的生牯仔先會到場，令你變得更慢、更怕曬同更快冇氣，形成惡性循環。
任何公司或組織舉行有比賽性質的足球活動，你更加唔敢參加。因為怕被撞瘀踢傷，好可能係冇人掂你都會自己受傷；最重要，係已經適應唔到比賽節奏，令你根本享受唔到足球嘅樂趣，連自己都嫌自己阻住地球轉……結果，就似我咁，遠離咗球場1年。
以前，我呢類人就會同簡東拿一樣，30歲就掛靴。感謝whatsapp出現，上周收到老友「X字頭大混戰」chat group嘅訊息，極速集齊年齡介乎20至50嘅波友。各人自備白色深色球衣各一，臨場分隊，早到踢先；唔夠人？可以9對9、8對8，自由龍。這樣便確保冇激烈競爭、冇超班對手。每邊有3、4個好跑得，又有3、4個唔係幾郁得：跑得快嘅，自然有快嘅人招呼；跑得慢嘅，亦夠膽喺後場扭波，各人志在享受球場上奔跑的感覺；最興奮，係我發覺自己仲識得入波！
各位遠離球場已久的3字頭，係時候開番個chat group，add晒合資格嘅聯絡人入去啦！
方柏翹
now足球評述員