美國公佈6月就業數據，失業率雖維持7.6%水平，但新增職位達19.5萬份，遠超預期嘅16.5萬份，4、5月數字亦齊齊向上修訂。經濟數據靚爆，聯儲局9月開始縮減買債規模應冇走雞，美國10年國債息率亦創兩年新高，見2.74厘。
進入後QE年代，高息股優勢不再，相反受惠美國經濟復蘇股份，則繼續睇高一線。新秀麗（1910）上周五搶高6.5%，重上20元及50日線，似為新一輪升浪打好根基。
主打旅行喼嘅新秀麗，銷售遍佈全球，當中又以美國市場最勁，以去年底數字計，收益佔比達27%，緊隨其後分別為中國及南韓，各佔10%及7%。截至3月底最新季度數字顯示，集團北美洲生意淨增長28.4%，跑贏亞洲嘅16.6%，北美洲生意佔比亦由28.4%增至30.4%，貼近亞洲區嘅38.3%，明顯食正美國復蘇概念。彭博綜合券商預測，新秀麗今年預測PE 18.3倍，較過去兩年平均折讓兩成，追回差價，股價可見24.50元，潛在升幅23%。
唐牛