上星期六喺印度贏咗亞錦賽4x100米跑金牌嘅港隊，除咗成為亞洲「1哥」外，包括鄧亦峻、黎振浩、吳家鋒、徐志豪及後備何文樂仲可瓜分125,000港元獎金，可喜可賀。
成功須苦幹！啱啱升格為亞洲「1哥」嘅港接力隊，喺印度為免食錯嘢肚屙，賽前成個禮拜硬啃自己煑嘅意粉同即食麵，負責最後一棒嘅徐志豪話最掛住香港嘅叉燒飯，就算知道獲香港田總嘅巨額獎金，但慶功仍要hold住，一來唔敢食印度嘢，二來之後要挑戰兩個歷史任務。
直指世錦賽全運會
講嘅係8月初俄羅斯舉行嘅世錦賽同9月初嘅遼寧全運會，近兩年多專心訓練呢支接力隊嘅余sir（余力）講到明冇得唞，首先目標係世錦賽殺入決賽，然後喺全運會爭金，是旦一樣做到都係香港歷史。
徐志豪就話，今次喺印度未算係最好狀態：「開心就一定開心，感覺同去年喺台灣造出香港紀錄一樣咁開心，但今次時間麻麻（38秒94），要更快先得。」港接力隊去年以原班人馬，第1至4棒順序為鄧亦峻、黎振浩、吳家鋒及徐志豪，在中華台北國際田徑賽造出38秒47的香港紀錄奪冠。
4x400跑又破港績
講到付出，黎振浩同第一後備兼有幫手跑初賽嘅何文樂，都犧牲唔少，為咗亞錦賽，呢兩個大專生被逼放棄世界大學生運動會，當然𠵱家真正成為亞洲「1哥」，真係乜到補番晒啦！
其實香港接力隊有今日成績，近幾年領軍嘅余sir真係功不可沒，今年4月初仲命令所有接力隊員（佢哋各自有不同教練），一星期至少跟操4日，幫大家建立默契外，亦可掌握各人進度。余sir話世錦同全運，至少要跑到38秒50，甚至破港績至有機會再創奇蹟。大家記得為呢班充滿正能量又擁有夢想嘅年輕跑手，一齊加加油啦！
另外，由梁景雄、陳嘉駿、蔡浩昇及陳胤霖組成嘅男子4x400米接力隊噚日首度參加亞錦賽，即以3分14秒34刷新香港紀錄（舊紀錄3分15秒31）。今次亞錦賽破紀錄嘅仲有林瑋，佢日前喺鏈球造出63米87新紀錄。港隊大軍明日朝早凱旋。
《蘋果動新聞》新版App已經推出，居家遊行上街上網都咁方便，快啲更新，全民動起來！
立即下載↓↓
【iPhone版】 http://bit.ly/appledailyiPhoneapp
【Android版】 http://bit.ly/appledailyandroidapp
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange