財爺曾俊華喺網誌自爆，細路仔喺美國讀書嗰陣係漫畫迷，仲同好多小朋友一樣，儲起零用錢買漫畫書，最鍾意《Silver Surfer》（銀影俠），比較冷門。Silver Surfer未獨立前，係《神奇四俠》系列裏面其中一個角色。
鬍鬚曾話，初中喺美國生活，當時零用錢唔多，但每星期都必定會努力儲起一個25美仙（華僑叫做「錢八」），去買一本漫畫書，睇完就當本錢，跟其他同學交換其他漫畫書睇，咁就可以最低成本睇最多漫畫。
佢介紹心愛嘅漫畫人物Silver Surfer時相當詳盡，由外型、厲害處、故事講乜，娓娓道來，睇得出佢當年真係刨得好熟。佢仲珍藏咗1968年出版嘅創刊號，即使有好朋友想借，佢都未必肯借，話係一般漫畫迷嘅堅持喎。