曼聯今個月會去亞洲季前集訓，會喺曼谷、悉尼、橫濱、大阪同埋香港5個亞洲城市打5場熱身賽，其中29號就對傑志。新任領隊莫耶斯話家陣隊波只得艾舒利楊格、基斯史摩寧同埋拿尼有傷，以及查維亞靴南迪斯（小豆）未能隨隊，如無意外可強陣訪亞洲，換言之本港球迷舊年睇唔到尹佩斯，今年可以睇番夠本啦！
小豆留英格蘭操練
喺上個禮拜五召開加盟曼聯後首個記者會嘅莫耶斯，透露咗紅魔喺亞洲之旅嘅大軍名單。家陣佢哋嘅艾舒利楊格、基斯史摩寧同埋拿尼，分別受足踝、腳同埋鼻傷困擾，可能參加唔到今個星期嘅操練，從而唔可以喺禮拜三上機出發去泰國。莫耶斯話：「我哋有幾個球員啱啱先至好番，未知趕唔趕得切參加操練，但仲有機會參加季前集訓。我哋會喺呢幾日再觀察一吓佢哋嘅傷勢，睇吓進展成點。」另外，小豆因為啱啱打完洲際盃，會留喺英格蘭操番弗狀態，所以，會缺席整個亞洲之旅。
呢個50歲嘅蘇格蘭教頭亦證實，有份踢今夏U21歐國盃決賽周嘅英格蘭新兵韋費特沙夏，會喺禮拜一向曼聯正式報到。至於啱啱幫日本踢完洲際盃嘅香川真司，就會喺21號喺日本同佢哋會合。
尹佩斯上年甩底
莫耶斯喺記者會上表明唔會賣朗尼，即係話朗尼應該會同喺宣傳海報上出現嘅艾拉、卡域克、湯卡華利、韋碧克、尹佩斯及尼曼查維迪，隨曼聯去亞洲踢5場季前熱身賽啦！猶記得尹佩斯舊年夏天因為轉投紅魔臨時甩底，冇隨阿仙奴嚟香港友賽傑志，但今年會跟曼聯嚟同香港球迷見面，算係補番數嘞，而場波亦一早賣晒飛。不過，曼聯就應該唔會再有新球員帶畀亞洲球迷睇，莫耶斯咁講：「我會盡力試吓，但時間始終太趕。」
對於曼聯有部份球員未必可隨隊訪港，傑志總領隊伍健就話，每次外隊賽或多或少會有球員未能隨隊，而距離賽事仍有一段時間，曼聯訪港名單仍有變數。佢話：「上年尹佩斯未有隨阿仙奴嚟香港對傑志，球迷同佢緣慳一面，希望佢同朗尼等球星今次可以隨曼聯來港。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange
《蘋果動新聞》新版App已經推出，居家遊行上街上網都咁方便，快啲更新，全民動起來！
立即下載↓↓
【iPhone版】 http://bit.ly/appledailyiPhoneapp
【Android版】 http://bit.ly/appledailyandroidapp