《哀》日聯經過過半月休戰後喺噚日重開，呢日川崎前鋒、新潟天鵝同名古屋鯨魚最威。川崎前鋒憑射手大久保嘉人梅開二度，主場贏鹿島鹿角4:2；天鵝則靠後備前鋒岡本英也喺補時4分鐘入絕殺入波，主場反勝柏雷素爾3:2；鯨魚就憑藉中場小川佳純喺89分鐘入波，主場贏清水心跳2:1。而喺噚日總共9場比賽，開咗4場和波，而且仲係得前鋒、天鵝同埋鯨魚可以喺主場全取3分㖭。相反榜首嘅大宮松鼠（圖中）就失威，成場波多次失機，結果仲喺完場前7分鐘失守，俾鳥棲砂岩嘅池田圭攻破大門而慘被逼和1:1；由於2哥浦和紅鑽憑後衞那須大亮入波而作客小勝甲府風林1:0，家陣紅鑽亦將同松鼠嘅距離，由5分拉近至3分。