【《蘋果》康城專訪】香港我主場，不過近年重心北移的杜琪峯（杜Sir）跟韋家輝這個組合，似乎不慣作客比賽，《單身男女》及《毒戰》都似作客球隊，惟獨重召劉德華、鄭秀文的《盲探》重回主場。杜琪峯與韋家輝早前在法國康城接受訪問，在你一言、我一語間剖析港片被迫作客出賽，被內地電影蓋過的原因，問題在於培育下一代的「根」不夠穩健，電影人承接乏力。
撰文：文國駿
杜琪峯執導、監製，韋家輝編劇的新片《盲探》，早前於法國康城影展上作午夜獻映，二人於當地接受本報專訪，只逗留康城數日的杜Sir，雖然要接受密集式訪問，但心情依然甚佳，例牌的雪茄、紅酒伴訪問。杜Sir表示每隔一段時間便重臨康城，每次心情也很輕鬆：「次次嚟啲嘢都冇乜點郁過，時間冇郁過，好似停咗喺度。康城影展聚集好多電影人，感覺好似武林大會，亦都見到西方人好尊重電影。」韋家輝則自言到康城的次數比杜Sir少很多，但覺得這小鎮變化很小，每次去相熟的餐廳也會撞見不少舊朋友。
與韋家輝分工清晰
談到二人的合作，杜Sir坦言經過多年後分工越來越清晰，他說：「韋家輝係大腦，主力創作，我就負責攝製，之後再畀佢做調節，今次《盲探》都係我哋傾傾吓偈，講到劉德華想做盲嘅角色，我哋都覺得幾好玩，慢慢你一句、我一句度個劇本出嚟。」對於外間指二人早前合作的電影《毒戰》似內地電視劇，今次《盲探》雖仍是合拍片，但終究回歸港片步伐，杜Sir聞言後沒好氣的說：「話《毒戰》似內地劇嗰啲人唔識嘢，內地咁耐都冇批過一個咁嘅故事，係一個好大嘅嘗試；到今次《盲探》的確係一部好香港人嘅戲，今次我哋雖然係合拍，但創作上可以大膽啲係因為故事發生喺香港，如果成個古仔喺內地就會困難啲，但發生喺香港，佢哋就冇理咁多。」
純港片與合拍片的關係，近年可以愛恨交纏來形容，因為合拍片雖然有龐大內地市場，但因題材要迎合內地觀眾口味，資深電影人莊澄曾指現今是香港電影生死存亡的階段，韋家輝則覺得問題未到這麼嚴重的地步，他說：「香港片最辛苦一定唔係𠵱家，係十年前，𠵱家內地市場放寬咗，係成個電影圈生態唔同咗，因為內地票房增長咁大，佢某程度上係畀香港電影人，但無可否認嘅係顧客群唔同咗，產品一定有啲改動。」
唔再去上海電影節
好拍檔杜Sir補充：「好似大自然定律咁，如果將植物曬太陽時，太陽個位唔同咗，植物都唔會死㗎，只係會向第二個方向生長囉，都係生存到。而電影遲早會出現呢個情況，係無可避免，我哋始終係中國人，香港電影都係中國電影，死唔死睇你點睇啦，我就覺得一日有香港人拍電影，香港電影一日都唔會死，不過香港新一代導演可唔可以再將電影推向高峰，就好睇佢哋造化。最大問題係『根』，好似我同韋家輝都無綫出身，徐克同許鞍華都係，但𠵱家成個氣候又孕育唔到好似我哋呢堆人，所以話香港電影死唔死唔關內地事，係你哋成日塘水滾塘魚，出極都係蝦毛，咁就死得啦！內地競爭力好大，人哋會鬥出撒手鐧，似足八十年代香港，香港電影唔係死喺人哋度，拍電影喺邊度拍都得，你睇李安拍幾多唔同國家、類型嘅電影，點會有問題。」
問到杜Sir覺得香港新一代導演剩餘的優勢？他說：「言論自由，如果我哋唔理內地市場嘅話講乜都得，但唔知仲可以維持幾耐，我希望仲有十年八年。新一代導演如果唔好好利用呢個優勢，將來人哋（內地導演）自由啲時你哋影都冇呀！十三億人搵十個導演容乜易，人哋好積極，可能有十個賈樟柯喺度等緊，千祈唔好話冇機會，𠵱家新人好快有一千幾百萬拍戲，我哋嗰時都流晒口水，政府又有資助，所以睇下一代電影人有冇決心，睇吓佢哋有冇把炮！」
此外，杜Sir前日到武漢宣傳電影，沒有去戲院出席見面會，發揮敢言特色：「我不理解導演跑影院的意義，這樣才能吸引觀眾，那是甚麼電影？我不希望再走戲院，重複講一些無所謂的對白，好像人肉答錄機。」更揚言永遠不會再去上海電影節，只因不是真正電影節，又不尊重電影。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
《蘋果動新聞》新版App已經推出，居家遊行上街上網都咁方便，快啲更新，全民動起來！
立即下載↓↓
【iPhone版】 http://bit.ly/appledailyiPhoneapp
【Android版】 http://bit.ly/appledailyandroidapp
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange