上周末李健和、司徒文俊與馮嘉奇於麥花臣出戰4人圍板賽，為香港足球評述員協會參加一年一度的「無家者世界盃籌款賽」。咪以為場仔細細，半個7人場唔夠的圍板內比賽好輕鬆，由於無出界、無停頓，困獸鬥般不斷撲上撲落，半場只是7分鐘，甲組腳落場都好快上氣唔接下氣。
小弟都有份落場，踢了120秒便眼冒金星爬出場區，無法啦，太陽熱到好似放喺球場隔離咁！幸好協會隊邀得李健和任球員兼教練，和哥落場無耐便掌握圍板賽及新賽制下的橋妙，不時於休息時間給予隊友指示。最終在和哥調兵遣將、司徒、馮奇lead住一班講波佬劉健基、崔錦棠、何柏霖、陳祉俊及黎奕倫等，配合荃灣隊隊友助拳，協會重奪最高榮譽的「曙光盃」冠軍，可喜可賀！有興趣可登入本會facebook重溫和哥英姿。
捧盃事小，賽事目的為香港代表隊籌募參加8月波蘭的「無家者世界盃」經費，據悉已籌得30萬元，在此亦要感謝貝鈞奇先生資助本會的參賽捐款。賽後還臨場加映香港代表隊對立法會議員隊表演賽；在議事廳做慣「進攻」的「長毛」，原來喺球場專職防守，民主黨單仲偕、工黨張超雄分別以皮鞋及跑鞋落場，都算別開生面！反而梁志祥同郭偉強原來最踢得！最終比數……議員隊好似輸多過10球，唔緊要啦！最緊要透過比賽，幫到有需要嘅人！
方柏翹
now足球評述員