思歪上台㩒住「地產霸權」嚟打，難得恒地（012）主席李兆基伸出友誼之手，捐地助年輕人上車，點知波兒夠膽請逾80歲的四叔「食檸檬」，綜觀全港地產界話事人年紀都唔細，檸檬食得多都嫌胃痛，試問仲有邊個敢示好？
朋友阿強讚超人眼光獨到，唔只對地產，對科技嘢亦眼光精準，扑親都中，認為其他地產商應該學下嘢。分散風險我等散戶以至身家以億計的地主都識講，有幾多人做到？噚日大陸媒體就提到一個失敗例子——合生創展（754）。
曾經堪稱內房龍頭的合生，在2004年成為首間突破100億元銷售額的內房，但在不少內房眼中的黃金10年內，合生一直停滯不前，舊年合生銷售額僅116億元，只及萬科十二分之一，最近更跌出內房50強。
合生都識得分散風險押注金融，實行多元化發展，但這卻拖住地產後腿，「錢荒」下金融股人見人怕，加埋歷年錯失多個時機，雖然合生有不少靚地，但要脫困不容易。
Samantha
本欄逢周三、五刊出