晉佳繼續睇淡後市，但未知反彈浪會玩到幾耐，如果要判斷港股短線見頂，最好就睇吓幾時有大手期指沽盤出現，情況一如6月25日出現龐大期指買盤，搞到期指成交張數去到歷史新高，然後港股就出現V形反彈。晉佳認為，情況應該相反亦對，期指沽盤湧現就係急跌先兆。
由於港股已經唔再短線超賣，之後博反彈空間少則只有三幾百點，多極可能係1,000點左右。睇埋強勢股網龍（777）、金山軟件（3888）噚日逆市下跌，就知博反彈買中市、買唔中股都一啲唔出奇，短炒難度偏高，要博反彈贏一成再出貨實在太難，如果唔小心輸埋第一棍急跌，就認真蝕底，所以𠵱家候高等造淡機會仲實際。
可支持高價搶地
呢一刻睇淡啫，再睇遠啲，當下半年港股一如預期急瀉，總有機會去撈貨，到時要博V彈贏大鑊，風眼位置嘅內銀同內房反而係唔錯嘅選擇。綠城中國（3900）呢類高波幅內房股，到時都可以考慮，博股價由破產價變番衰退價就夠晒發達，到時再換馬去基本因素良好嘅股份。
講開綠城，基本因素都絕對唔差，其中一個賣點，係背後有九倉（004）撐腰。之前綠城為人詬病就係重債，九倉入股嘅效應，就係可以幫綠城融資時爭取到較低息率。佢喺5月發行25億元人民幣優先票據，年利率低至5.625厘，隨時比同業平息三幾個百分點，唔好睇少呢個籌碼，做房地產業務最緊要貨如輪轉，如果融資成本相比同業特別低，有能力以較高價搶地，對快速發展業務無往而不利，亦足夠令盈利大幅上升。
重債股能唔能夠用低息融資，絕對關鍵，高槓桿重債股如中建材（3323）、玖紙（2689），就有可能因為控制唔到融資成本，而大幅削弱盈利能力，雖然回顧金融海嘯同埋歐債危機低位出現V形反彈，呢兩隻股升勢非常強勁，不過，高債、高息似乎會令呢兩隻股出現內傷，之所以最近跌到唔識反彈，除非呢批股跌到去破產價，否則不作考慮。
晉佳
本欄逢周三、周五刊出