港鐵（066）噚日正式宣佈，委任馬時亨做獨立非執董，馬時亨做財經事務及庫務局局長時，曾做過港鐵非執董，估唔到事隔多年又做番董事，市場傳聞，佢兩年後仲有機會接替錢果豐做港鐵主席㖭呀，原來放開手真係可以得到更多㗎。
張震遠出事益咗佢？
馬時亨2008年因患腦動靜脈血管畸形而辭官，但冇歸故里，過咗一排就開始擔任唔少上市公司董事，最爆係佢2009至2012年擔任中策（235）非執董同主席期間，計劃蛇吞象收購台灣南山人壽，失敗收場。佢家陣都係農行（1288）、中鋁（2600）同華潤置地（1109）獨董。
市傳CY喺「首席梁粉」張震遠旗下商交所出事前，諗過委任張震遠入港鐵董事局，遲下做主席，點知商交所5月出事，張震遠辭晒公職，轉過頭，馬時亨入圍了，世事真難料。