昨日講完淡市求生，要學識汰弱留強，弱勢資源股隨即爆上，相反魏力一手強勢股就要跌，認真冇癮！不過，呢種技術「死貓彈」唔博好過，因為強者始終越強，專心坐強股，不理市場雜音，除笨仍有精。
幾日冇推過股，畀番隻心水大家，就係TCL通訊（2618）。去年以來，聰明錢輪流炒作智能手機股，由最初的瑞聲（2018），再到舜宇（2382），之後到中國無線（2369），而目前最炙手可熱就係TCL通訊。隻股最sexy之處，在於由傳統手機轉型生產智能機，兼且已現成功之象，盈利準備大翻身！要轉型成功，定位十分重要，集團主攻1,000元人仔的平價機，再巧妙避開大陸市場激烈競爭，放眼美洲、歐洲、非洲及中東市場。首季收入分佈顯示，80%來自上述地區，可謂殺出血路。分析指，集團不像中興（763）、華為般受外國政府制肘，能夠與當地營運商如Vodafone及AT&T合作，推出自主品牌手機，為日後盈利爆炸性增長奠下基礎。
摩通報告睇5.5元，明年PE得7.5倍，PB 1.4倍，可見大把水位炒上。走勢上，10日線剛拗腰回升，MACD重現牛差，昨日第一棍破位，成交配合是吸納好機會，首個目標睇5蚊。
魏力
http://www.facebook.com/2012jason
本欄逢周一、二、四、五刊出