有跟開本欄嘅讀者都知道，唐牛對唔少中資股絕不睇好，就以散戶愛股中建材（3323）為例，年初至今喪跌52%，現價市盈率5倍唔夠，係咪博得過呢？唐牛對此不敢苟同，須知道內地錢荒未解決，基建難以上馬，建材需求大不如前，中建材今年業績肯定走樣，盈利下跌令市盈率回升，跌浪難言完結。
頁岩氣股乃少數呈強嘅中資板塊，始終概念獨特，前景亮麗，當中海隆控股（1623）近期非常硬淨。海隆主要從事產銷油氣鑽井設備及塗層物料，為全球頁岩氣專用鑽桿大型生產商之一，能夠逆市造好，與拍得大碼頭不無關係。集團5月宣佈與殼牌訂立協議，向其提供陸地鑽探及修井機服務，雖然單價僅7億銀，但難得與大品牌合作，升呢在望。內地第三輪頁岩氣招標延遲，令板塊持續受壓，項目未來一旦重啟，肯定成為升市催化劑。海隆現價PE 17倍，較安東油田（3337）折讓近五成，配合較同業更強走勢，有望率先破頂。
唐牛