藝術B在火炭租咗一個千零呎工廠大廈單位做畫室，不經不覺已有好幾年，最近碰到佢，先知佢已經搬咗，佢話地點越近火車站，租金越貴，去年於是搬咗去一間遠少少嘅大廈，離「火炭玻璃屋」（即幕牆寫字樓大廈）不遠。自從林鄭月娥一聲活化工廈之後，好多業主以為執到寶，炒定活化概念先，加租話都冇咁快，工廠大厦呎價亦猛咁升，但林鄭局長變咗做司長，所謂工廈活化，究竟係實際還是啤酒泡？牛頭角一啲工廠大厦仍然係八至九元一呎租，呎價就幾千蚊一呎，根本毫無回報率可言，入市炒九龍東工廠者，慎防中招，中咗唔好鬧林鄭呀，佢打開口牌你又信！
藝術B等等已經係成名或半成名藝術家，交少少租，仍然捱得住，新進年輕藝術工作者仍未成家，想租畫室，去邊度好？左丁山近日碰到藝術發展局主席王英偉，佢話藝發局有一個「ADC藝術空間計劃」，周圍搵工業大厦單位俾年輕藝術家／藝團租用，最近得到地產界知名善長方潤華先生慷慨撥出一層位於黃竹坑嘅工業大廈，作「藝術空間」用途，每平方呎收租約五元五角至八元，遠低於市值租金15元，只限有資格人士申請，藝發局將呢層10,254平方呎嘅樓面，間隔為十幾個面積由四百平方呎至一千三百平方呎嘅藝術工作室，租俾視覺藝術與媒體藝術家，年齡最好在40歲以下，以示鼓勵後進。
方潤華老先生嘅協成行集團撥出樓面之外（黃竹坑道33至35號12樓），藝發局搵埋政府撥款八百幾萬嚟資助裝修費、起動費、新進藝術家租金津貼等。咁鬼好，左丁山問王主席：「你識得咁多地產商，仲唔去搵多幾層工業大廈做藝術發展空間？越多越好噃！」王主席話問題好複雜嘅，因為要不同政府部門審批更改大厦用途，得消防局同意，呈交城規會批准，只要消防局唔like，講乜都冇用喎！唔怪得啦，左丁山從側面打聽，知道有工廈業主願意捐出四萬呎樓面支持藝術家，但消防局話不符防火條例，於是拉倒。你知啦，要完全合乎防火條例，改裝工程費怕要幾百萬元，搵邊個付鈔噃。