大熱天時萬幾人一齊睇波，都真係可以焗到人中暑。有兩位女球迷好有創意，將兩個網球放上身，變成網球比堅尼（圖），性感得嚟又健康，即時令球場清涼番唔少。唔單止性感，亦有球迷出盡法寶，好似帽型遮咁，真係又搶鏡又實用。
兩岸合作贏埋「1姐」
兩岸合作又成功，打入女雙4強！中華台北嘅謝淑薇（右）同中國嘅彭帥（左），今年喺女雙可以話係遇神殺神；喺8強對塞爾維亞女單前「1姐」積歌域同克羅地亞球手盧絲巴朗妮組合，輕鬆以盤數2:0擊敗對手。「中台」組合喺4強，將會對日本青山修子（日本）、舒希柏絲(南非)組合。
羅拉笠臣「勁過」迪祖
英國90後小將羅拉笠臣，雖然喺女單16強就出咗局，但就已經吸引咗唔少球迷注意，最近仲成為twitter嘅人氣天后（圖）！根據IBM年度第2份twitter報告顯示，喺溫網舉行期間，呢位19歲球手個名嘅出現率，比起同胞梅禮、塞爾維亞「1哥」迪祖高域仲要高。後生、可愛又好波，羅拉笠臣人氣高企唔係冇道理！
