Instagram追加拍片　15秒自編自導

只得15秒的短片，要你分享生活點滴，你會拍甚麼？Instagram最近新加拍片功能；今日走訪美肌TVC女主角Jancy，想不到她竟然是Instagram達人，為善用呢15秒，佢就玩盡新增嘅剪片同濾鏡效果，自編自導拍Making Of！

記者：陳國輝
攝影：陳永威

模特兒：[email protected]

單指剪片兼製作花絮

最近幫美容產品拍廣告而走紅的Jancy，原來一直好鍾意玩社交App，最愛是用facebook、Twitter、Flickr來分享生活上的點點滴滴：「最近放假去了馬來西亞旅行，影咗好多靚人靚景；旅行途中我還將它們即時Upload上網，同班Friend一齊分享。」
淨係硬照，當然唔夠喉，自從上星期Instagram新增拍片功能之後，佢已經單撈咗仲即時試玩：「整體感覺，介面同以前基本上無分別，早已用慣用熟；反而最方便我，係一隻手指㩒住Record掣，佢就會不斷錄影，如果放手再㩒，就會變成另一個Shot，好似幫你剪埋片咁，勁好用！」
但對Jancy來講，佢就嫌15秒唔多夠用，如果想玩即興，都要諗過度過先可以Roll機！而且經Instagram發佈的影片，亦只能夠用該App的內置攝錄程式拍攝（其它拍片程式完全不對應），又唔能夠Upload舊影片，限制多多！但Jancy認為，分享影片，始終係Instagram最易用，所以佢經常去玩或者工作，都會隨時隨地自製「Making Of」，同佢班粉絲齊齊Share。

Instagram
類型：社交分享
費用：全免

最近為美容產品拍廣告，佢都有使用Instagram拍花絮。

去到邊、拍到邊，即興即玩，肯定係Instagram一大特色。

13款影片濾鏡　自己做封面

即興、分享，固然係Instagram主要賣點！新增拍片模式除咗有剪片功能，仲提供專為拍片而設嘅13款濾鏡效果，包括Stinson、Vesper、Dogpatch等，無論玩復古風、黑白片，又抑或負片，上下移動就可以即時預覽效果，玩法同平常用Instagram影硬照差不多。
另外，決定好影片長度、濾鏡效果之後，你就可以幫影片起番個朵；而最過癮係，喺發佈影片前，你仲可以從片段內揀一張靚相，作為影片封面；假如畀你見到facebook封面係靚女Jancy，睇怕都會Click入去睇啦！